懷胎十月真係好唔容易....我的生產過程
唔經唔覺就已經陀左十個月，期間都真係遇到唔少挫折，
對於一個仲要返工嘅大肚婆黎講，真係一步一驚心...
而且我返嘅工仲要係勞動性高，成日要搬重野，又要琴高琴低。
加上自己本身又有哮喘，有左BB兩個月果時仲入過ICU
所以由有左到依家卸左貨，BB都仲係好健康，真係好感恩。
我預產期係3月9日，我返工返到2月26日就開始放我嘅產假啦。
(放得咁遲其實都有D擔心會突然係公司發動。)
不過一日兩日三日咁等，遲遲都未有動靜，諗住大安止意可以抖多兩個星期啦...
點知3/3夜晚就被告知遲我一日預產期嘅男朋友呀哥個老婆(我應該叫大嫂?)
穿左羊水入左醫院等生...
即時自己都緊張起上黎唔知自己會幾時生呢?
會係穿水先見紅先定係陣痛先呢?會唔會係街突然穿水呢?
好多個問號係個心入邊，就係我諗緊嘅時候，
BB就好似知道我個心諗梗D咩咁，急不及待想出黎...
第二日朝早，即係4/3，一朝早起身就覺得下腹隱隱作痛
一去廁所仲要見埋紅添...不過自己都好冷靜，冇話即刻去醫院
好施然咁走去沖個涼先，之後再睇定D諗住如果真係痛得好勁先出聲
去到夜晚個肚真係拿住拿住痛，而且開始變得有規律，
先決定第二日朝早跟埋屋企人去威爾斯探"大嫂"，順便入埋院待產
5/3朝早啦，執定晒所有野，沖埋涼洗埋頭再買埋幾排朱古力就出發啦
去到醫院，姑娘循例幫我禁下肚仔，問下陣痛嘅密度同陣痛嘅部位，
就安排我即時入院啦。個產前病房都幾爆下，威爾斯真係名不虛傳出名多產婦
埋到床位(記得係訓7F26號床位)換埋套粉紅色勁大嘅醫院衫，
就比姑娘叫左去CHECK胎心同胎動啦...訓係張床度成半個中，爭D訓著埋。
CHECK完都係反反埋張床度無了期地等幾時會有突如其來嘅疼痛
本身係屋企都仲數到自己陣痛係有規律嘅，但係一去到醫院就變左時有時無咁
最終過左一晚都仍然係痛下唔痛下，心諗可能第二日會比人趕返出院
6/3入醫院第二日，一朝早起身就希望自己可以今日成功生到BB...
雖然知道真係發動嘅時候一定會好痛，但都想速戰速決，
好過日日留係醫院等運到。
見到隔離床D人一個一個咁走，有D更加痛到係張床到叫晒救命，
果刻就覺得有D心寒，仔細D聽個姑娘話得2度，我心諗叫到咁樣先得2度
咁睇黎我應該有排架啦，更加唔敢想像開到10度到底係會有幾痛
其他床嘅媽咪開始同我傾計，令到我覺得好WARM同埋D時間過得快D
不過去到夜晚嘅時候我明顯感覺到自己比起前兩日痛得犀利左同密左
我冇即刻叫姑娘幫我睇開幾度，因為自知自己應該都係未開，
同埋之前個姑娘話要成個肚都痛先係黎料，咁我覺得只係條腰同下腹痛到不得了
自然就唔敢叫姑娘啦，之前聽人講CHECK度數仲痛過陣痛，所以都唔敢亂黎
去到半夜，真係痛到要用深呼吸黎幫自己舒緩，但都只係下腹痛
心諗死啦，都未開始上腹痛就已經痛得咁緊要...
不斷係咁食我入院前買嘅朱古力，都係舒緩唔到，開始仲有D急急地嘅感覺
所以襯自己仲落到床快D去痾左先，點知真係痾極都冇野出
聽呀媽講就生得果時係會感覺好想痾咁，自覺應該差唔多
即刻返埋張床執定晒D野先，以我呢兩日見咁多大肚婆出出入入拎定晒經驗
知道一CHECK夠度數就會即刻比人送去侯產室，連電話都冇得打
執完晒野決定繼續係張床度典到第二朝護士循房先叫姑娘幫我CHECK度數
呢幾個中真係好難頂，已經痛到唔識數幾多分中痛一次啦，
而且每次一痛都開始忍唔住HEHE唉唉咁樣，我知會嘈到其他人訓，所以都盡量忍
終於係痛到標冷汗嘅時候，姑娘循房啦，當時應該係8點左右
姑娘見我痛到塊面都青埋就即刻話幫我CHECK下開左幾多度
一CHECK原來已經開左三度，姑娘都話我好叻...
本身想試下起唔起到身食野，但真係痛得制，一啖都食唔落
只好希望琴晚食嘅朱古力可以幫到手比到能量我等我唔好無力生啦
好快地，姑娘比左個暖袋我敷肚，但一D止痛感覺都冇，仲好快就已經唔暖
之後姑娘再問我需唔需要用無痛分娩，因為之前見麻醉科醫生佢建議我要做
驚我哮喘會病發，心郁郁想架，因為都唔知仲要痛幾耐，不過都係答左唔洗
跟住佢地就比左件紫色袍我換，過多一陣就送我過侯產室啦
我聽到好多人同我講加油，但實在痛到唔識得比反應...但真心多謝佢地。
去到侯產室，聽到好多好淒厲嘅叫聲，而我亦都又痛又攰，因為已經幾晚冇訓過教。
個PATPAT係咁好似想痾D野出黎咁，係咁忍住真係超辛苦，又驚自己真係痾左D臭臭出黎
所以諗左一諗都係決定做無痛分娩，可以快D解脫。
事關去到呢一刻我都只係感覺到極之腰痛同埋想痾嘅感覺，
但呢種感覺已經足已令我覺得痛到標冷汗...
都仲未開始有宮縮已經痛成咁，睇黎如果真係去到十度我會暈左
之後果幾個中我都係不斷深呼吸不斷大叫，本身唔想叫嘅，但聽到附近叫得咁勁
自己就試下睇下會唔會叫左冇咁痛啦。叫左都係痛，不過分散左注意力令我唔好成日想痾
諗住無痛分娩針一打就可以擺脫呢種感覺啦，點知都唔知係好睬定唔好睬
或者注定左啦，我一直等等等等到4點中，當時姑娘已經幫我CHECK左開到7度了
仲幫我人手穿埋水添(痛到叫救命呀)，呢個時候麻醉科醫生先到，
佢同我講我個度數已經開到好大，可以自己生埋佢，
當時除左絕望同無奈都唔知可以比咩反應
諗住可以用其他止痛方法啦，點知個醫生又講因為我有哮喘唔用得，
因為止痛針或者止痛機會有嗎啡，有機會令我哮喘發作。
OK FINE，當我唔好睬，我忍埋佢啦唯有....
好慶幸自己冇叫到男朋友陪產....因為我一定會仲更加緊張。
過多冇幾耐就比人通知話我可以落產房啦。
大概5點中落到產房再CHECK度數已經有9度，姑娘話我算開得快
但數落都已經過左成8個中，再唔生我真係怕我會餓到冇力生呀。
好想佢話比我知我可以就咁生得，因為我已經係咁想痾個BB出黎
一痾佢地就話BB心跳減慢叫我唔好痾，但我真係忍唔到
佢地要我忍多一個中先，開夠十度先可以生得...
依家先發覺原來我由頭到尾都冇宮縮過，所以你問我係唔係好痛
我又覺得唔係，但因為冇宮縮到生果刻真係唔夠力推個BB出黎
加上自己又哮喘，個肺功能岩岩合格但又唔夠氣,,,
6點中一CHECK十度，就開始叫我出力痾啦....
但因為自己實在唔夠氣所以都用左好一段時間先PUSH到佢出黎
6點半左右，終於出到啦...不過都係要剪會陰，一直最驚嘅一樣野
但原來去到生果刻已經覺得冇野再怕，
BB一出黎即刻覺得一身鬆晒，之後都係冇力痾個胎盤出黎，要D姑娘幫手整出黎
果刻個身已經唔願意再用力啦，只係好想訓教...
什至連電話我都唔打算打比我屋企人/男朋友，因為我根本攰到記唔起任何一個電話
佢地幫BB抹完身剪埋臍帶就將佢抱係我心口啦，
我聞住佢成身嘅羊水味，輕撫佢，覺得真係好不可思議，
佢好細粒，姑娘話好在佢細粒我先易生炸，咁又係呀，本身已經冇氣，再大粒D都唔知點生
佢得2.68KG(大概5磅9左右啦)，姑娘讚佢眼大似我，我會心微笑左
又話佢喊得斯文，對比其他房果D佢真係好斯文，因為我連隔離產房個BB喊我都聽到
又唔知過左幾耐，佢地幫我打左局部麻醉聯埋針，我就訓著左，
到我醒反我都依然係產房張床上邊...依然唔係好敢相信自己已經經歷左最痛嘅十個中
到我去到產後病房已經係十點幾嘅事，餓到傻左，但醫院過左食飯時間，
佢地只係比左幾塊包同幾塊餅比我充飢
有D後悔做咩頭先唔打比男朋友叫佢過黎買野食比我
之後佢地就推返我個BB黎我床邊，就開始同BB渡過第一個晚上啦
我永遠都會記得2017年3月7日呢一日。
有一個生命係我個肚入邊誕生左。
而呢個生命將會成為我人生轉捩點影響我一生。
希望呢位BB可以係我照顧下健健康康咁成長。
你作為我嘅兒子係命中注定嘅事，
由我有左你果一刻開始，就決定要把你生下來，
這是我對你嘅承諾，雖然創造你是純熟意外
但我相信這些都是銘銘中注定了要發生的
我與你的相遇絕對是一種緣份。。
19/3/2017(今天是你出生的第十三天，現在才補回這篇生產紀錄，
剛做媽媽太累了，是今天才有小小空閒可以幫BB成立這個BLOG)
留言
張貼留言