我和陳寶寶係醫院嘅生活。好攰好攰嘅開始

講真岩岩做人呀媽真係好唔習慣...
由第一日返到埋張床開始仲係好似發梗夢一舊飯咁...
到依家兩個星期人仔日日都有新鮮事、新煩惱

我的湊B初體驗

細個扮呀媽玩湊BB就玩得多，真係有個BB係度完全係兩回事

係醫院果幾日基本上寶寶都只係識得訓、食、痾
而佢訓嘅比例係最多嘅，同埋佢基本上都冇咩點喊
就算喊都好容易就可以安撫到佢。
第一晚真係連個BB一日要食幾餐，隔幾個中食一次都唔知
剩係知道姑娘話一得閒就要比BB埋身食奶，咁樣先可以快D上奶
所以我真係每隔一兩個中就抱住BB迫佢飲...
佢都係有時啜有時啜啜下就訓著左，之後點都整唔醒佢
又驚佢會肚餓，唯有勤力D餵多幾次啦...
之後先知道原來BB頭一兩日自己有儲備，係可以唔需要食咁多嘅
同埋見佢都有便便同殊殊就開始放鬆返D啦。

換片，一開始都真係一頭霧水，又驚整到成手都係
好在BB頭果幾個中都冇痾到臭臭姐，
可以比時間我偷聽隔離姑娘教其他媽咪換片
自己再跟住學，好易就上手啦
最好笑係，記得我第一日連塊片嘅正面同背面都著錯左
去到第二日先驚覺自己原來一直都著錯左

全晚嘅生活基本就食餵奶換片抖一抖又重覆，
連玩電話嘅時間都冇，更加唔好話訓教，
就算訓都只係訓到一個中左右，其他時間一係比自己BB喊聲嘈醒
一係就比其他BB喊聲嘈醒，再唔係就姑娘過黎量血壓量體溫
量完自己，仲要量埋BB

陳寶寶做身體檢查

去到第二日早上，BB要做身體檢查同埋打針
咁細個就要打針，真係有D肉赤，一打落去BB即時大喊
而做身體檢查果度就有D難過，
本身朝早姑娘話佢有D低溫，推左佢去暖箱訓左半個中
再晏小小就話佢個生殖器官有D積水，要寫紙比我去健康院跟進
(我好似未講佢到底係男定女，"佢係男仔黎")
之後去到夜晚嘅時候又有個姑娘好凝重咁走黎同我講
"之前抽左D臍帶血去化驗，依家個報告出左，你BB患有G6PD缺乏症，即係俗稱嘅蠶豆症"
當堂聽到有D想喊嘅感覺，明明家族病史完全冇呢種病，但BB就唔好睬地中左
不過都冇辦法啦，知道左個病係跟一世就唯有面對啦，小心D啦
凌晨12點，無啦啦個姑娘又走黎話我BB偏黃，要帶佢去照燈，之後就推走左佢
好無奈地BB就咁離開左我視線，而佢地亦都冇同我講會幾時帶返BB返黎
我只係知如果要照燈一定唔係一晚嘅事
換言之我預計我自己聽日就可以出院，即係BB唔可以跟埋我一齊出院
諗到呢度就有D唔開心啦...
不過向好果方面諗，終於都有一日可以訓教啦，
由陣痛果日開始我就已經冇一晚有教好訓。

最後，我9/3就出左院啦，而BB就要遲多我兩日先出院
BB留院果兩日我都有忍住傷口嘅痛由大埔坐的士去威爾斯睇佢
BB11/3都可以出院啦，雖然個心真係好想佢可以快D出院
不過我自己都知如果BB出左院就會開始冇教好訓架啦....
事實就係依家忙到每日都訓唔到5個中。。。

我都知做得人呀媽就要有做呀媽嘅覺悟，所以冇得訓又算係D咩...
我會繼續努力架啦，希望快D適應到啦